ខេត្តបាត់ដំបង!អាជ្ញាធរខេត្តបាត់ដំបងបានប្រកាសជាសាធារណ:ទាំងយប់សម្រេចបិទទីតាំងចំនួន ៣បន្ថែមទៀតនៅស្រុកសំពៅលូន ក្រោយពាក់ព័ន្ធជាមួយនឹងបុរសម្នាក់វិជ្ជមានកូវីដ-១៩មកពីរាជធានីភ្នំពេញ។

   លិខិតផ្លូវការមួយរបស់រដ្ឋបាលខេត្តបាត់ដំបងដែលប្រកាសចេញជាចំហរនៅយប់ថ្ងៃទី ២០ ខែឧសភា ឆ្នាំ ២០២១នេះបង្ហាញឲ្យដឹងថា÷ ដើម្បីចូលរួមកាត់ផ្តាច់ខ្សែចម្លងជំងឺកូវីដ-១៩ រដ្ឋបាលខេត្តបានសម្រេចបិទទីតាំងមួយចំនួននៅក្នុងស្រុកសំពៅលូន ជាបណ្តោះអាសន្នសិនរងចាំរហូតដល់មានការជូនដំណឹងសារជាថ្មី។

   ការបិទមួយរយ:តូចជាបណ្តោះអាសន្នចំនួន ៣ទីតាំងខាងលើរួមមាន: ផ្ទះសំណាក់បាយន្តថ្មី. ផ្ទះលក់បាយ-បបរនិងហាងបោកអ៊ុតយក្សា ឋិតនៅក្នុងភូមិសាស្ត្រភូមិអូរស្ងាត់ និងភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង ក្នុងគោលបំណងទប់ស្កាត់ការរីករាលដាលនៃជំងឺកូវីដ-១៩ ក្រោយពីបានស្រាវជ្រាវរកឃើញមានការប្រាស្រ័យទាក់ទងគ្នាជាមួយនឹងបុរសម្នាក់ឈ្មោះ នុម ដុង ភេទប្រុស អាយុ ៣៦ឆ្នាំ រស់នៅភូមិត្រពាំងរំចេក សង្កាត់ចោមចៅ រាជធានីភ្នំពេញបានឆ្លងកាត់ដើម្បីលក់ដូរចែកចាយថ្នាំកសិកម្មរបស់ក្រុមហ៊ុនគោខ្មែរ ដែលបានរកឃើញជំងឺកូវីដ-១៩ កាលពីថ្ងៃទី ១៩ ខែឧសភា ឆ្នាំ ២០២១កន្លងទៅ។

   សេចក្តីប្រកាសរបស់រដ្ឋបាលខេត្តក៏បានបញ្ជាក់បន្ថែមដែរថា÷ ក្នុងអំឡុងពេលបិទទីតាំងខាងលើជាបណ្តោះអាសន្ននេះត្រូវបិទហ៊ុព័ទ្ធទីតាំង និងផ្អាកការធ្វើអាជីវកម្ម មិនអនុញ្ញាតិឲ្យមានការចេញ ចូលឡើយ ក្រៅពីនេះប្រសិនបើបុគ្គលណាមិនគោរពតាមដោយមានចេតនាល្មើសនិងវិធានការខាងលើនឹងប្រឈមចំពោះមុខច្បាប់ដោយមិនលើកលែងឡើយ៕……………..