ខេត្តព្រះសីហនុៈបើទោះបីជាបច្ចុប្បន្ននេះជំងឺគូវិតកំពុងវាយឡុក និង បង្ករភាពវឹកវរស្ទើគ្រប់ប្រទេសយ៉ាងណាក្តី សម្រាប់ខេត្តព្រះសីហនុ បញ្ហាវិបត្តិទំនាស់ដីធ្លី ហាក់នៅតែបន្តស្ទើជារៀងរាល់ថ្ងៃ ជាក់ស្តែង មួយរយះចុងក្រោយនេះ នៅស្រុក ស្ទឹងហាវ និង ស្រុកកំពុងសិលា បញ្ហាដីធ្លីនៅតែជាបញ្ហាក្តៅគគុកដ៏ដែល ដូចជាសំណុំរឿងទំនាស់ដីធ្លីនៅមួយកន្លែងស្ថិតក្នុង ភូមិវាល ឃុំកំពុងសិលា ស្រុកកំពង់សិលា ខេត្តព្រះសីហនុ បាននឹងឡើងកម្តៅយ៉ាងខ្លាំង ខណះភាគីម្ខាងសំអាងប័ណ្ណកម្មសិទ្ឋ ភាគីប្រជាពលរដ្ឋមួយក្រុមពុំមានឯកសារ តែសំអាង ការកាន់កាប់ជាក់ស្តែង(កាប់ព្រៃ)។
លោក ចាន់ ពន្លក អភិបាលរងស្រុកកំពង់សិលា បានឆ្លើយបញ្ជាក់ក្រោយកិច្ចប្រជុំរវាងភាគីម្ចាស់ប័ណ្ណកម្មសិទ្ឋ និងភាគីតំណាងប្រជាពលរដ្ឋ នាព្រឹកថ្ងៃទី១១មិថុនាឆ្នាំ២០២១ថា ចំពោះបញ្ហាទំនាស់ដីធ្លីនេះ ភាគីលោកស្រី សេរី កូស៊ិន ដែលមានទីលំនៅបច្ចុប្បន្នរាជធានីភ្នំពេញ សំអាងទៅលើប័ណ្ណសិទ្ឋចំនួន០៣ ប័ណ្ណ(បទបញ្ជា០១)ចេញកំឡុងឆ្នាំ២០១៤ដោយភាគីម្ចាស់ប័ណ្ណបានចោទថា ក្រុមប្រជាពលរដ្ឋកាប់ទន្ទ្រានលើដីកម្មសិទ្ឋស្របលេខ ១៨៧,១៦៨,១៩២ ដែលមានទីតាំងស្ថិតក្នុងភូមិវាល ឃុំកំពុងសិលា ស្រុកកំពង់សិលា ខេត្តព្រះសីហនុ ឯភាគីប្រជាពលរដ្ឋមានចំនួនជិត១០០គ្រួសារ គឺពុំមានឯកសារអ្វីទាំងអស់ ហើយបានចោទភាគីម្ចាស់ដីថាបានឃុបឃិតគ្នា លេងបួនសន្លឹកជាមួយពួកគាត់ ដោយប័ណ្ណកម្មសិទ្ឋទាំងនេះ មិននៅលើទីតាំងដីដែលពួកគាត់កាប់ព្រៃរុករានកាន់កាប់ជាយូឆ្នាំនោះទេ។លោក អភិបាលរងបានគូសបញ្ជាក់ទៀតថា បើពិនិត្យទៅលើឯកសារ ផ្លូវច្បាប់ឃើញថា ភាគីលោកស្រីសេរី កូស៊ិន ហាក់មានប្រៀបជាង។ ប៉ុន្តែដើម្បីបញ្ជាក់អោយបានកាន់តែច្បាស់ បន្ថែមទៀត ក្រោយមានកិច្ចប្រជុំជំនួបទាំងពីរភាគី ក្រុមការងារថ្នាក់ស្រុកដែលដឹកនាំប្រជុំដោយលោកផ្ទាល់បានសម្រេច បង្កើតគណះកម្មាធិការចំរុះ ចុះទៅធ្វើការវាស់វែង រកចំនុចនិយាមការ ទាំង០៣ប័ណ្ណរបស់លោកស្រីសេរី កូស៊ិន និងទីតាំងដីដែលប្រជាពលរដ្ឋអះអាងថា ពួកគាត់កាន់កាប់យូរហើយនោះ តើវាជាន់ត្រួតស៊ីគ្នាដែឬទេ? ដើម្បីងាយស្រួលដល់ក្រុមការងារវាយតម្លៃ និង អនុវត្តន៏និតិវិធីអោយមានតម្លាភាព ទៅតាមផ្លូវច្បាប់ មិនអាចភាគីណាមួយរំលោភបំពានភាគីណាមួយបាននោះទេ។
ឆ្លើយតបទៅនឹងការសម្រេចនេះ ភាគីលោកស្រីសេរី កូស៊ិន និងភាគីតំណាងប្រជាពលរដ្ឋ ក៏បានឯកភាពគ្នា កំណត់ថ្ងៃចុះពិនិត្យទីតាំងជាក់ស្តែង ដើម្បីបង្ហាញអំពីភាពស្អាតស្អំរៀងៗខ្លួន ព្រោះកន្លងមកភាគីទាំងពីរសុទ្ឋតែមានអំណះអំណាងរៀងៗខ្លួន។
សូមបញ្ជាក់ថា បើយោងតាមប្រភពពីភាគីតំណាងលោកស្រីសេរី កូស៊ិន បានបញ្ជាក់ថា ទីតាំងដីទំនាស់នេះ ពួកគាត់បានទិញត្រឹមត្រូវដោយមានប័ណ្ណកម្មសិទ្ឋស្របច្បាប់ មានការទទួលដឹងឬពីអាជ្ញាធរមូលដ្ឋាន គឺភាគីគាត់ពុំបានទៅរំលោភដីរបស់ប្រជាពលរដ្ឋនោះទេ ។ដីដែលកំពុងទំនាសជាមួយប្រជាពលរដ្ឋមានចំនួនជាង១០ហិចតា ក្នុងចំណោមផ្ទៃដីសរុបរបស់ ទាំង០៣ប័ណ្ណមានទំហ៊ំសរុបជិត៣០ហិចតា ដែលដីខ្លះមានដំណាំ និងដីខ្លះពុំទាន់មានដំណាំទេ ព្រោះគាត់បានដាំកូនឈើបន្ថែមដើម្បី ត្រៀមបង្កើតជាតំបន់ទេសចរណ៏ធម្មជាតិ។