កម្មវិធី «រត់ដើម្បីសប្បុរសធម៌ជាមួយសាយ» ដែលនឹងមានគម្រោងរត់រយៈពេល ៩៩ ថ្ងៃ បានរត់មកដល់គោលដៅដោយជោគជ័យហើយនៅថ្ងៃទី ១០ ខែមករា ឆ្នាំ ២០២១ ដែលជាថ្ងៃទី ៩៧ នៃដំណើរការរត់នៃកម្មវិធីនេះ។

យ៉ាងណាមិញ ទោះជាកម្មវិធី «រត់ដើម្បីសប្បុរសធម៌ជាមួយសាយ» ដែលជាការបង្កើតឡើងដោយតារាចម្រៀង original song លោក សាយ បានមកដល់គោលដៅមុនថ្ងៃកំណត់នៃការបញ្ចប់នូវកម្មវិធីដែលបានគ្រោងទុកក៏ពិតមែន ប៉ុន្តែដំណើរការនៃការរៃអង្គាសថវិកាជួយដល់មន្ទីរពេទ្យកុមារអង្គរក៏នៅបន្ត រហូតដល់ថ្ងៃទី ២៤ ខែមករា ឆ្នាំ ២០២១។

តួយ៉ាងបើគិតត្រឹមថ្ងៃទី ១៥ ខែមករា ឆ្នាំ ២០២១ នេះ ទឹកប្រាកដែលទទួលបានពីសប្បុរសធម៌តាមរយៈការបរិច្ចាគនៃកម្មវិធី «រត់ដើម្បីសប្បុរសធម៌ជាមួយសាយ» គឺទទួលបានទឹកប្រាក់ប្រមាណ ៤៨ ម៉ឺនដុល្លារហើយ ។ នេះបើតាមការឲ្យដឹងពីលោក សាយ មកកាន់ «ប្រជាប្រិយ» ។

ក្នុងនោះលោក សាយ ក៏បានបញ្ជាក់បន្ថែមថា «ទឹកប្រាក់ប្រមាណជា ៤៨ ម៉ឺនដុល្លារនោះ គឺអាចជួយជីវិតកុមារកម្ពុជាដែលសម្រាកព្យាបាលនៅមន្ទីរពេទ្យកុមារអង្គរជាង ១ ម៉ឺនករណី ពោលគឺជាង ១ ម៉ឺននាក់ហើយ ព្រោះបើគិតតាមរបាយ​កាណ៍​ពីមន្ទីរពេទ្យកុមារអង្គរ គឺការព្យាបាលកុមារម្នាក់មន្ទីរពេទ្យត្រូវចំណាយប្រាក់ប្រមាណជា ៤៦ ដុល្លារ » ។

លោក សាយ ក៏បានអរគុណចំពោះការបរិច្ចាគ ចំនួនទឹកប្រាក់សរុបបានមកពីសប្បុរសជនទាំងអស់គ្នា ដែលជាចំណែកនៃការ​ជួយជីវិតកុមារកម្ពុជាដែលសម្រាកព្យាបាលនៅមន្ទីរពេទ្យកុមារអង្គរ ហើយលោក សាយ ក៏សំណូមពរដល់សប្បុរសជនចូលរួមបរិច្ចាគបន្ថែមទៀត ដើម្បីជួយជីវិតកុមារកម្ពុជាឲ្យបានកាន់តែច្រើន៕

អត្ថបទដោយ​៖ Vathey