(ព្រះសីហនុ)៖ កម្លាំងនៃស្នងការដ្ឋាននគរបាលខេត្តព្រះសីហនុ ដឹកនាំបញ្ជារផ្ទាល់របស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានស្រាវជ្រាវឃាត់ខ្លួនជនសង្ស័យចំនួន២នាក់ ពាក់ព័ន្ធករណីលួចម៉ូតូ។ ក្រុមជនសង្ស័យបានប្រព្រឹត្តកាលពីថ្ងៃទី១៨ ខែឧសភា ឆ្នាំ២០២១ វេលាម៉ោង១៩ នឹង៥៥នាទី នៅចំណុចអូរទី៣ ស្ថិតនៅក្រុមទី២២ ភូមិ៥ សង្កាត់៤ ក្រុង-ខេត្តព្រះសីហនុ។

លោកឧត្តមសេនីយ៍ត្រី កុល ផាលី ស្នងការរងខេត្ត បានឱ្យដឹងថា ជនសង្ស័យមិនស្គាល់អត្តសញ្ញាណ បានធ្វើសកម្មភាព លួចម៉ូតូ ០១គ្រឿង ម៉ាក ហុងដាសេ១២៥ ស៊េរីឆ្នាំ២០១៨ ពណ៌ខ្មៅ ស្លាកលេខៈ រដ្ឋ-661-7059 មានលេខតួ និងលេខម៉ាស៊ីនៈ 5256933 ក្នុងខណៈពេលដែលជនរងគ្រោះចតទុកនៅក្នុងបរិវេណផ្ទះ រួចជិះគេចខ្លួនបាត់។

លោកបន្តថា បន្ទាប់ពីទទួលបានបណ្តឹងរបស់ជនរងគ្រោះ កម្លាំងជំនាញផែនការងារនគរបាលព្រហ្មទណ្ឌ បានស្រាវជ្រាវយ៉ាងយកចិត្តទុកដាក់ រហូតដល់វេលាម៉ោង០០នឹង២០នាទី រំលងអាធ្រាត្រ ទើបឃាត់ខ្លួនបានជនសង្ស័យចំនួន ០២នាក់ ភេទប្រុស ជនជាតិខ្មែរ នៅចំណុច ភូមិ១ សង្កាត់២ ក្រុង-ខេត្តព្រះសីហនុ និងដកហូតបានវត្ថុតាង ម៉ូតូដែលបានបាត់ខាងលើ ដោយស្លាកលេខម៉ូតូត្រូវបានជនសង្ស័យ ដោះបោះចោល។ លោកឧត្តមសេនីយ៍ត្រី កុល ផាលី បន្ថែមថា ជនរងគ្រោះឈ្មោះ សាន់ ថាន់ ភេទប្រុស អាយុ៤៧ឆ្នាំ មុខរបរមន្ត្រីរដ្ឋករទឹក មានទីលំនៅក្រុមទី២២ ភូមិ៥ សង្កាត់៤ ក្រុង-ខេត្តព្រះសីហនុ។សម្ភារបាត់បង៖ ម៉ូតូ ០១គ្រឿង ម៉ាក ហុងដាសេ១២៥ ស៊េរីឆ្នាំ២០១៨ ពណ៌ខ្មៅ ស្លាកលេខៈ រដ្ឋ-661-7059 មានលេខតួ និងលេខម៉ាស៊ីនៈ 5256933។ជនសង្ស័យទី១-ឈ្មោះ តឹក លីវុទ្ធារិទ្ធ ភេទប្រុស អាយុ២៨ឆ្នាំ មុខរបរមិនពិតប្រាកដ មានទីលំនៅ ភូមិ១ សង្កាត់៤ ក្រុង-ខេត្តព្រះសីហនុ, ទី២-ឈ្មោះ ថោង សាវ៉ាត ហៅ ញ៉ក់ ភេទប្រុស អាយុ២១ឆ្នាំ មុខរបរ មិនពិតប្រាកដ មានទីលំនៅ (ទំនប់រលក) ភូមិ៣ សង្កាត់១ ក្រុង-ខេត្តព្រះសីហនុ។វត្ថុតាងចាប់យកបាន៖ ម៉ូតូ ០១គ្រឿង ម៉ាក ហុងដាសេ១២៥ ស៊េរីឆ្នាំ២០១៨ ពណ៌ខ្មៅ គ្មានស្លាកលេខ មានលេខតួ និងលេខម៉ាស៊ីនៈ 5256933 ។បច្ចុប្បន្នជនសង្ស័យកម្លាំងជំនាញកំពុងសាកសួរ និងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី៕