ខេត្តកណ្ដាល៖ថ្លែងនៅក្នុងពិធីបិទកិច្ចប្រជុំឆ្លុះបញ្ចាំង លទ្ធផលការងារឆ្នាំ២០២០ និងលើកទិសដៅការងារឆ្នាំ២០២១ របស់គណៈកម្មាធិការពិគ្រោះយោបល់កិច្ចការស្ត្រី និងកុមារ(គ.ក.ស.ក)ខេត្តកណ្ដាល កាលពីរសៀលថ្ងៃទី២១ ខែមករា ឆ្នាំ២០២១នេះ ឯកឧត្តមបណ្ឌិត ម៉ៅ ភិរុណ ប្រធានក្រុមប្រឹក្សាខេត្តកណ្ដាល បានគាំទ្រ ការអភិវឌ្ឍន៍ សមត្ថភាព ស្ត្រី ក្នុងការចូលរួមធ្វើសេចក្តីសំរេចចិត្ត រាប់ទាំង វិស័យ នយោបាយ វិស័យ មុខងារសាធារណៈ និងការអភិវឌ្ឍន៍ វិស័យ សេវាសង្គម។

ក្នុងពិធី បិទកិច្ចប្រជុំនេះ ឯកឧត្តមប្រធានក្រុមប្រឹក្សាខេត្ត បានវាយតម្លៃខ្ពស់ចំពោះលទ្ធផលការងារដែល គ.ស.ក.សខេត្តសំរេចបានរយៈពេលពេញ១ឆ្នាំនេះ និង បានជម្រុញអោយ គ.ក.ស.ក ថ្នាក់ខេត្ត ក្រុង-ស្រុក និងឃុំ-សង្កាត់ និងបណ្ដាមន្ទីរអង្គភាពពាក់ព័ន្ធត្រូវបញ្ចូលសកម្មភាព ពាក់ព័ន្ធ នឹងបញ្ហាសមភាព យេនឌ័រលើស្ត្រី យុវជន កុមារ និងជនងាយរងគ្រោះទៅក្នុងផែនការអភិវឌ្ឍន៍ និងកម្មវិធីវិនិយោគ៣ឆ្នាំរំកិលប្រចាំឆ្នាំ នៅថ្នាក់រដ្ឋបាលនីមួយៗរបស់ខ្លួន។

លោកជំទាវ នួន នារតី សមាជិកក្រុមប្រឹក្សាខេត្តនិងជាប្រធាន គ.ក.ស.កខេត្ត បានបញ្ជាក់ថា៖ សម្រាប់កិច្ចប្រជុំរយៈពេលមួយថ្ងៃនេះ គឺមានសារៈសំខាន់ណាស់ ពីព្រោះបានផ្ដល់នូវធាតុចូលជាច្រើនសម្រាប់ គ.ក.ស.ក គ្រប់ថ្នាក់យកទៅពិចារណា និងប្រតិបត្តិក្នុងការបំពេញមុខងារភារកិច្ចរបស់ខ្លួន ឲ្យបានកាន់តែមានប្រសិទ្ធភាពខ្ពស់ និងប្រសិទ្ធផល ក្នុងការលើកកម្ពស់ស្ថានភាពស្ត្រី យុវវ័យ កុមារ និងជនងាយរងគ្រោះ ក៏ដូចជាការលើកកម្ពស់វិស័យសេវាសង្គម ប្រកបដោយសមធម៌ និងបរិយាបន្នក្នុងខេត្តកណ្ដាល។