ខេត្តកណ្ដាល៖ គណៈកម្មាធិការពិគ្រោះ យោបល់ កិច្ចការ ស្ត្រី និងកុមារ ហៅកាត់ថា (គ .ក ស .ក) បានបើកកិច្ចប្រជុំ របស់ខ្លួន ដើម្បីឆ្លុះបញ្ចាំងការអនុវត្តការងារប្រចាំឆ្នាំ២០២០ និងលើកទិសដៅការងារឆ្នាំ២០២១ ដែលបានធ្វើឡើង នៅសាលា ខេត្ត កាលពីថ្ងៃទី ២១មករា នេះ ។
ថ្លែង បើកកិច្ចប្រជុំ អភិបាលខេត្តកណ្តាល ឯកឧត្តម គង់ សោភ័ណ្ឌ បានចាត់ទុកការងារ គ.ក.ស.ក មានសារសំខាន់ណាស់ ក្នុងបរិបទកូវីដ-១៩ នាពេលបច្ចុប្បន្ននេះ ព្រោថាវាមិនគ្រាន់តែជួយលើកស្ទួយ សិទ្ធិ ស្ត្រី និងកុមារប៉ុណ្ណោះ ទេ ប៉ុន្តែ វាបាន លប់ បំបាត់ ការកេងប្រវញ្ច័ ចាញ់បោកបញ្ឆោត របស់ជនល្មើស មកលើស្រ្តីនិងកុមារជាជនរងគ្រោះផងដែរ។
គួរបញ្ជាក់ថា៖កិច្ចប្រជុំនាព្រឹកនេះ បានផ្តោតសំខាន់លើរបៀបវារៈ សំខាន់ៗរួមមាន៖
១-ពិនិត្យលទ្ធផលការងារប្រចាំឆ្នាំ២០២០ និងលើកទិសដៅការងារឆ្នាំ២០២១ របស់គណៈកម្មាធិការពិគ្រោះយោបល់កិច្ចការស្រ្តី និងកុមារខេត្ត
២-ឆ្លុះបញ្ចាំងចំណុចខ្លាំងបញ្ហាប្រឈម និងមេរៀនបទពិសោធន៍ក្នុងការអនុវត្តមុខងារភារកិច្ចរបស់ គ.ក.ន.ក
៣-លើកកម្ពស់ការយល់ដឹងអំពីគោលនយោបាយជាតិ ស្តីពីប្រព័ន្ធកិច្ចការពារកុមារ វិទ្យាសាស្រ្តប្រព័ន្ធប្រសាទ និងការអភិវឌ្ឍកុមារតូច
៤-ចែករំលែកមេរៀនបទពិសោធន៍ ក្នុងការអនុវត្តតួនាទី ភារកិច្ច របស់ គ.ក.ស.ក ស្រុក និង គ.ក.ស.ក ឃុំ
៥-ជម្រុញការអនុវត្តសកម្មភាពសេវាសង្គម ឃុំ សង្កាត់ ឆ្លើយតបទៅនឹងតម្រូវការរបស់ប្រជាពលរដ្ឋពិសេស យុវវ័យ និងជនងាយរងគ្រោះ។
នាឱកាសនោះ ឯកឧត្តម គង់ សោភ័ណ្ឌ បានកោតសរសើរ វាយតម្លៃខ្ពស់ចំពោះលទ្ធផល ការងាររបស់ ថ្នាក់ដឹកនាំ មន្ត្រីជំនាញ គ.ស.ស.ក ខេត្តកណ្តាល កន្លងមកក៍ដូចបច្ចុប្បន្ន បានខិតខំប្រឹងប្រែងបំពេញការងារ របស់ខ្លួន ក្នុងការអប់រំផ្សព្វផ្សាយបញ្ជ្រាបអោយស្រ្តីនិងកុមារ យល់ ដឹងកាន់តែច្បាស់ពីច្បាប់និងវិធានការ របស់រាជរដ្ឋាភិបាល ក្នុងការការពារទប់ស្កាត់ ការប្រើអំពើហឹង្សាក្នុងគ្រួសារ ការកេងប្រវញ្ច័ពលកម្មកុមារ ការជួញដូរមនុស្សការជួញដូរផ្លូវភេទជាដើម បានល្អប្រសើរ គួរអោយកត់សំគាល់។
ឯកឧត្តមអភិបាលខេត្ត ជំរុញអោយថ្នាក់ដឹកនាំ គ.ក.ស.ក សហការជាមួយអាជ្ញាធរមានសមត្ថកិច្ចបន្តរឹតបន្តឹង ការអនុវត្ត ច្បាប់ និងចាត់វិធានការ ដើម្បីឃាត់ខ្លួនជនប្រព្រឹត្ត បទល្មើស មកផ្តន្ទាទោសតាមច្បាប់ជាធរមាន៕