កំពង់ឆ្នាំង៖ ព្រឹកថ្ងៃទី២០ ខែមករា ឆ្នាំ២០២១នេះ នៅសាលប្រជុំ សាលាខេត្តកំពង់ឆ្នាំង បានបើកកិច្ចប្រជុំបូកសរុបលទ្ធផលការងារឆ្នាំ២០២០ និងទិសដៅការងារ ឆ្នាំ២០២១ របស់គណៈកម្មាធិការសមាគមអតីតយុទ្ធជនកម្ពុជាខេត្ត និងគណៈកម្មាធិការគ្រប់គ្រងគ្រោះមហន្តរាយខេត្ត ក្រោមអធិបតីភាពដ៏ខ្ពង់ខ្ពស់ ឯកឧត្តមនាយឧត្តមសេនីយ៍ គន់ គីម ទេសរដ្ឋមន្រ្តី ទទួលបន្ទុកបេសកកម្មពិសេស អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងជាអគ្គលេខាធិការសមាគមអតីតយុទ្ធជនកម្ពុជា។

កិច្ចប្រជុំមានការអញ្ជើញចូលរួមពី ឯកឧត្តម ឧត្ដមសេនីយ៍ ឯកឧត្ដម ជាថ្នាក់ដឹកនាំសមាគមអតីតយុទ្ធជនកម្ពុជា ថ្នាក់ដឹកនាំគណៈកម្មាធិការជាតិគ្រប់គ្រងគ្រោះមហន្តរាយ, ឯកឧត្ដម ឡុង ឈុនឡៃ ប្រធានក្រុមប្រឹក្សាខេត្ត, ឯកឧត្ដម ឈួរ ច័ន្ទឌឿន អភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត, អភិបាលរងខេត្ត, ស្នងការ មេបញ្ជាការកម្លាំងប្រដាប់អាវុធគ្រប់ប្រភេទដែលឈរជើងក្នុងភូមិសាស្ត្រខេត្ត, នាយកសាខាកាកបាទក្រហមខេត្ត, អង្គការដៃគូពាក់ព័ន្ធ, ប្រធាន មន្ទីរអង្គភាព, អភិបាល ក្រុងស្រុក, ថ្នាក់ដឹកនាំកម្លាំងទាំងបីប្រភេទនៅថ្នាក់ក្រុងស្រុក, ប្រធានការិយាល័យសង្គមកិច្ច និងសុខុមាលភាពក្រុងស្រុក, នាយកទីចាត់ការ ប្រធានអង្គភាពសាលាខេត្ត និងមន្ត្រីលេខាធិការដ្ឋាននៃគណៈកម្មាធិការគ្រប់គ្រងគ្រោះមហន្តរាយខេត្ត។

ក្នុងឱកាសកិច្ចប្រជុំនេះដែរ ឯកឧត្តម នាយឧត្តមសេនីយ៍ ទេសរដ្ឋមន្រ្តី បានអំពាវនាវដល់សប្បុរសជននានាក្នុងខេត្ត ឱ្យជួយបរិច្ចាគជាថវិកាសម្រាប់សាងសង់ផ្ទះជូនគ្រួសារអតីតយុទ្ធជនក្នុងខេត្ត ដែលមានដីហើយ តែមិនទាន់មានផ្ទះរស់នៅបានចំនួន ៣៨ខ្នង ដែលក្នុងមួយខ្នងតម្លៃ ២ ៥០០ $ ក្នុងនោះ ឯកឧត្តម នាយឧត្តមសេនីយ៍ ទេសរដ្ឋមន្រ្តី ជួយឧបត្ថម្ភផ្ទះចំនួន ១០ខ្នង, ឯកឧត្តម យ៉ែម រចនា ១០ខ្នង, ឯកឧត្តម ឈួរ ច័ន្ទឌឿន អភិបាលខេត្ត ៥ខ្នង, លោកឧត្តមសេនីយ៍ទោ ខូវ លី ស្នងការនគរបាលខេត្ត ២ខ្នង, លោកឧត្តមសេនីយ៍ត្រី សាក់ សារ៉ាង មេបញ្ជាការកងរាជអាវុធហត្ថខេត្ត ២ខ្នង, លោក លី សុភា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ២ខ្នង, លោក ជិន រដ្ឋា ប្រធានមន្ទីរអភិវឌ្ឍន៍ជនបទខេត្ត ១ខ្នង, លោក ដោក ប៊ុនថុន ប្រធានមន្ទីរធនធានទឹក និងឧតុនិយមខេត្ត ១ខ្នង, លោក ឆាយ លាភា ប្រធានមន្ទីរសាធារណការ និងដឹកជញ្ជូនខេត្ត ១ខ្នង, លោក ថោង ចំរើន ប្រធានមន្ទីរសង្គមកិច្ច និងអតីតយុទ្ធជនខេត្ត ១ខ្នង, លោក អ៊ូ ជួបកុសល ប្រធានមន្ទីរសេដ្ឋកិច្ច និងហិរញ្ញវត្ថុខេត្ត ១ខ្នង, ឯកឧត្ដម វេជ្ជ. ប្រាក់ វ៉ុន ប្រធានមន្ទីរសុខាភិបាលខេត្ត ១ខ្នង និងលោក ងិន ហ៊ុន ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត ១ខ្នង។

បន្ទាប់ពីបញ្ចប់កិច្ចប្រជុំ ឯកឧត្តមនាយឧត្ដមសេនីយ៍ ទេសរដ្ឋមន្រ្តី និងប្រតិភូ រួមដំណើរដោយឯកឧត្ដមអភិបាលខេត្ត ឯកឧត្ដម អភិបាលរងខេត្ត ជាប្រធានលេខាធិការដ្ឋាន នៃគណៈកម្មាធិការគ្រប់គ្រងគ្រោះមហន្តរាយខេត្ត ប្រធានមន្ទីរពាក់ព័ន្ធ និងអាជ្ញាធរមូលដ្ឋាន បានអញ្ជើញចុះទៅពិនិត្យទីទួលសុវត្ថិភាពដែលកំពុងដំណើរការសាងសង់ ក្រោមគម្រោង CMDRR របស់ គណៈកម្មាធិការជាតិគ្រប់គ្រងគ្រោះមហន្តរាយ និងអង្គការកម្មវិធីស្បៀងអាហារពិភពលោក នៅឃុំខុនរ៉ង ស្រុកបរិបូណ៌, ពិនិត្យការងារដាំដុះដំណាំស្រូវរបស់ប្រជាកសិករ ដែលទទួលបានពូជពីរាជរដ្ឋាភិបាល សម្រាប់ស្ដារឡើងវិញក្រោយទឹកជំនន់ ក្នុងភូមិសេះស្លាប់ ឃុំឆ្នុកទ្រូ និងពិនិត្យផ្សារសមុទ្រទឹកសាប នៅឃុំឆ្នុកទ្រូ ស្រុកបរិបូណ៌ ៕