ឯកឧត្តមគួច ចំរើន អភិបាលនៃគណអភិបាលខេត្តព្រះសីហនុ អញ្ជើញទៅទទួលភ្ញៀវទេសចរណ៍ត្រឡប់មកពីកោះ នៅកំពុងផែព្រះសីហនុ

(ព្រះសីហនុ)៖ ឯកឧត្តមគួច ចំរើន អភិបាលនៃគណអភិបាលខេត្តព្រះសីហនុ នៅព្រឹកថ្ងៃទី១៧ ខែកក្កដា ឆ្នាំ២០២៣នេះ បានបញ្ជាឲ្យលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បញ្ចេញកប៉ាល់ធំៗចំនួន៥គ្រឿង ដើម្បីទៅដឹកជញ្ជូនភ្ញៀវទេសចរដែលជាប់គាំងនៅតាមបណ្ដាកោះនានា ដោយសារបញ្ហាអាកាសធាតុខ្យល់កន្ដ្រាក់ និងរលកធំៗកាលពីថ្ងៃកន្លងទៅ។

ថ្លែងប្រាប់បណ្ដាញព័ត៌មាន ឯកឧត្តមគួច ចំរើន បានអះអាងថា ព្រឹកនេះដោយមើលឃើញអាកាសធាតុធូរស្រាល និងរលករៀងស្ងប់បន្ដិចនោះ លោកបានបញ្ជាឲ្យស្នងការខេត្ត បញ្ចេញកប៉ាល់ធំៗ ចំនួន៥គ្រឿង ដើម្បីទៅទទួលភ្ញៀវទេសចរដែលជាប់នៅតាមបណ្ដាកោះ មកកាន់ដីគោកវិញ។
អភិបាលខេត្តព្រះសីហនុ បានគូសបញ្ជាក់ថា បើទោះបីរៀងស្ងប់ខ្យល់ និងរលកបន្ដិចក៏ពិតមែន ប៉ុន្ដែសមត្ថកិច្ចដែលចេញទៅទទួលភ្ញៀវទេសចរទាំងអស់នោះ ត្រូវត្រៀមលក្ខណៈគ្រប់បែបយ៉ាងដើម្បីការពារហានិភ័យដែលអាចកើតមានឡើង ក្នុងនោះ មន្ដ្រីនគរបាលជើងទឹក ក៏ត្រូវជិះអមដំណើរអ្នកទេសចរណ៍ ហើយអ្នកទេសចរណ៍នោះទៀតសោត ត្រូវតែពាក់អាវពោងឲ្យបានគ្រប់ៗគ្នា។

គួរជម្រាបថា ដោយសារបញ្ហាអាកាសធាតុភ្លៀង ខ្យល់កន្ដ្រាក់ និងរលកធំៗនោះ អាជ្ញាធរបានសម្រេចផ្អាកឲ្យភ្ញៀវទេសចរដែលទៅកម្សាន្ដនៅតាមបណ្ដាកោះនានា មកដីគោកវិញជាបណ្ដោះអាសន្នសិន ដោយរង់ចាំស្ថានភាពធូរស្រាល ហើយនៅព្រឹកនេះ ទើបមានការរៀបចំកប៉ាល់ធំៗ រួមជាមួយសមត្ថកិច្ច ដើម្បីទៅទទួលភ្ញៀវទាំងអស់នោះត្រឡប់មកកាន់ដីគោកវិញ។

បច្ចុប្បន្នកប៉ាលធំបានដឹកភ្ញៀវទេសចរណ៍មកដល់ដីគោកចំនួន៤គ្រឿងដែមានមនុស្សចំនួន៣០០នាក់ជាង ហើយលោកបានបន្ថែមកប៉ាល១គ្រឿងដើម្បីបន្ថែមទៅយក កប៉ាលសរុបទាំងអស់ចំនួន៦គ្រឿង។ ព័ត៌បន្ថែមអង្គភាពយើងអាប់ដេតតាមក្រោយ ដោយនី វ៉ាន់នីន 087758866