ស្រុកព្រៃនប់៖ ប្រជាពលរដ្ឋចំនួន 2 ភូមិ នៅព្រឹកថ្ងៃទី 2 ខែមេសាឆ្នាំ 2023 នេះបានមកប្រមូលផ្ដុំគ្នាស្នើសុំច្រានចោលពាក្យបណ្តឹងរបស់ឈ្មោះ ភឿន ផល្លាឲ្យបានឆាប់រហ័សដោយក្ដីអនុគ្រោះ ដើម្បីឲ្យប្រជាពលរដ្ឋបានចុះបញ្ជីដីធ្លីលក្ខណៈប្រព័ន្ធស្របតាមច្បាប់និតិវិធី។
យោងតាមលិខិតរបស់ពលរដ្ឋស្នើសុំច្រានចោលពាក្យបណ្តឹងរបស់ ឈ្មោះ ភឿន ផល្លា ក្នុងភូមិអូរឧកញ៉ាហេង ភូមិអូរតាសេក ឃុំអូរឧកញ៉ ប្រជាពលរដ្ឋរស់នៅ ស្រុកព្រៃនប់ ខេត្តព្រះសីហនុ ដែលមានទំនាស់ដីធ្លីជាមួយភាគី លោក ភឿន ផល្លា បានដាក់លិខិតគោរពជូន លោកមេឃុំអូរឧកញ៉ាហេង។
តាមកម្មវត្ថុ សំណើសុំច្រានចោលពាក្យបណ្តឹងរបស់ ឈ្មោះ ភឿន ផល្លា ដែលបានប្តឹងជំទាស់ ពលរដ្ឋមិនឱ្យធ្វើការចុះបញ្ជីដីធ្លី ហើយនឹងចេញប័ណ្ណកម្មសិទ្ធិទាំងដែលយើងខ្ញុំជាម្ចាស់ដីដែលបានកាន់កាប់អាស្រ័យផលជាក់ស្ដែងអស់រយៈពេលដែលមានលិខិតស្នាមទទួលស្គាល់ពីអាជ្ញាធរភូមិឃុំត្រឹមត្រូវជាង២៧ឆ្នាំមកហើយ ។សេក្តីដូចបានជម្រាបជូនខាងលើ សូមលោកមេឃុំ មេត្តាស្នើសុំច្រានចោលពាក្យបណ្តឹងរបស់ឈ្មោះ ភឿន ផល្លាឲ្យបានឆាប់រហ័សដោយក្ដីអនុគ្រោះ ដើម្បីឲ្យប្រជាពលរដ្ឋបានចុះបញ្ជីដីធ្លីលក្ខណៈប្រព័ន្ធស្របតាមច្បាប់និតិវិធីក្នុងពេលឆាប់ៗខាងមុខនេះ។
ឆ្លើយតបទៅនឹងការស្នើសុំនេះលោកកែវលេងបានគូសបញ្ជាក់ថាលោកនឹងពាំនាំនូវការស្នើសុំរបស់ប្រជាពលរដ្ឋទៅកាន់ថ្នាក់លើរដ្ឋបាលស្រុកនិងគណៈអភិបាលខេត្តព្រោះលោកពុំមានសិទ្ធិក្នុងការសម្រេចនេះទេ។
ដោយឡែកភាគីក្រុមហ៊ុនលោកភឿន ផល្លា យើងនៅពុំទាន់អាចសុំការបំភ្លឺបាននៅឡើយទេ ប៉ុន្តែអង្គភាពយើងខ្ញុំនឹងរង់ចាំការបំភ្លឺពីក្រុមហ៊ុនរបស់លោកភឿន ផល្លាគ្រប់ពេលវេលា ជុំវិញបញ្ហាវិវាទព្រោះវាងប្រជាពលរដ្ឋជំនួនពីភូមិ ប្រមានជាង 200 គ្រួសារ។