ត្ត្បូងឃ្មុំៈ ក្រុមគ្រូពេទ្យ ស្ម័គ្រចិត្ត ឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដីនគរូបនីយកម្ម និងសំណង់ សហការជាមួយក្រុមគ្រូពេទ្យមន្ទីរពេទ្យខេត្តត្បូងឃ្មុំ និងក្រុមគ្រូពេទ្យមន្ទីរពេទ្យបង្អែកស្រុកប្រតិបត្តិ ក្រូចឆ្មារ បានពិនិត្យព្យាបាលជម្ងឺភ្នែក ជូនប្រជាពលរដ្ឋ ដោយឥតគិតថ្លៃក្នុងស្រុកក្រូចឆ្មារ ខេត្តត្បូងឃ្មុំ ចាប់ពីថ្ងៃទី ១៤ ដល់ថ្ងៃទី ១៦ ខែវិច្ឆិកា ឆ្នាំ ២០២២ ក្នុងបរិវេណមន្ទីរពេទ្យបង្អែកស្រុកប្រតិបត្តិក្រូចឆ្មារ ។
ឯកឧត្តម វេជ្ជបណ្ឌិត កែវ វណ្ណៈ ប្រធានមន្ទីរសុខាភិបាលខេត្តត្បូងឃ្មុំ បានឲ្យដឹងថា ក្រុមគ្រូពេទ្យ ស្ម័គ្រចិត្ត ឯកឧត្តម ជា សុផារ៉ា ដែលដឹកនាំដោយ លោកស្រី ជា ស៊ីវម៉ី សហការជាមួយក្រុមគ្រូពេទ្យខេត្តត្បូងឃ្មុំ បានចុះមកពិនិត្យព្យាបាលជម្ងឺភ្នែកនេះ គឺក្រោមការយកចិត្តទុកដាក់ពី សំណាក់ ឯកឧត្តមឧបនាយករដ្ឋមន្ត្រី ជា សុផារ៉ា ប្រធានក្រុមការងារថ្នាក់ជាតិចុះជួយខេត្តត្បូងឃ្មុំ ហើយបានយកស្រុកក្រូចឆ្មារមួយ ជាស្រុកគោលដៅសិន ក្នុងរយៈពេលបីថ្ងៃ គឺពីថ្ងៃទី ១៤ ដល់ថ្ងៃទី ១៦ ខែវិច្ឆិកា ឆ្នាំ ២០២២ ។
.
ឯកឧត្តមបន្តថា ហើយទន្ទឹមនឹងនេះដែរ ការចុះពិនិត្យព្យាបាលជម្ងឺភ្នែកនេះ គឺមិនមានការគិតថ្លៃសេវាអ្វីឡើយ ពោលគឺពិនិត្យ ព្យាបាល ពិគ្រោះយោបល់ បញ្ហាភ្នែកជូនពលរដ្ឋដែលមកពីតាមបណ្តាលភូមិក្នុងស្រុកក្រូចឆ្មារ និងមានប្រជាពលរដ្ឋខ្លះទៀតមកតាំងពីខេត្តក្រចេះផងដែរ ៕