ខេត្តត្បូងឃ្មុំៈ នៅរសៀល ថ្ងៃទី ០៥ ខែ ឧសភា ឆ្នាំ ២០២១ ឯកឧត្តម ពាង ណារិទ្ធ អភិបាលរងខេត្តត្បូងឃ្មុំ និងជាប្រធានគ្រប់គ្រងគម្រោង LASED II ខេត្តត្បូងឃ្មុំ បានចុះចែកផ្តល់ឥណទានរបស់គម្រោង ដល់សមាជិកក្រុមទុនបង្វិលលេីកទី១ ចំនួន៦ក្រុម ស្មេីនឹង៩៦នាក់ ដែលជាសម្បទានិក រស់នៅក្នុងតំបន់បែងចែកដីដេីម្បីសង្គមកិច្ច និងការអភិវឌ្ឍសេដ្ឋកិច្ច ស្ថិតនៅក្នុងភូមិស្រែលេីសែនជ័យ ឃុំជាំក្រវៀន ស្រុកមេមត់ ខេត្តត្បូងឃ្មុំ គាំទ្រមូលនិធិដោយធនាគារពិភពលោក (WB) និងរាជរដ្ឋាភិបាលកម្ពុជា ។

ឯកឧត្តម ពាង ណារិទ្ធ អភិបាលរងខេត្តត្បូងឃ្មុំ បានលើកឡើងពីការយកចិត្តទុកដាក់ របស់រាជរដ្ឋាភិបាល ក្នុងការរៀបចំ និងបែងចែកដីជូនប្រជាពលរដ្ឋ ធ្វើជាកម្មសិទ្ធរួម គួបផ្សំនិងការអភិវឌ្ឍន៍ លើគ្រប់វិស័យ ដើម្បីប្រជាពលរដ្ឋអាចរស់នៅ ប្រកបរបរចិញ្ចឹមជីវិត បន្តទៅទៀតនៅក្នុងតំបន់នេះ ។
ឯកឧត្តម អភិបាលរងខេត្ត បន្តថា បងប្អូនប្រជាពលរដ្ឋនៅទីនេះ ធ្វើការដាំដុះ សម្រាប់ទទួលទានផង និងផ្គត់ផ្គង់នៅទីផ្សារផង ដោយទទួលបាននូវប្រាក់កំរៃសមរម្យ សម្រាប់ទ្រទ្រង់ជីវភាពគ្រួសារ ។ ចំពោះការផ្តល់ជូននូវទុនបង្វិល ក្នុងតំបន់នេះ គឺបងប្អូនប្រជាពលរដ្ឋ អាចយកទុនទាំងនេះទៅពង្រីកការដាំដុះដំណាំកសិផលផ្សេងៗ រួមទាំងការចិញ្ចឹមសត្វ បន្ថែមទៀត ដើម្បីទទួលបានជីវភាពល្អប្រសើរទៅថ្ងៃអនាគត ។
ឯកឧត្តម អភិបាលរងខេត្ត ក៏បានសំណូមពរ សូមឱ្យបងប្អូនប្រជាពលរដ្ឋទាំងអស់ ត្រូវបន្តអនុវត្តន៍អោយបានខ្ជាប់ខ្ជួន នូវវិធាននានា របស់រាជរដ្ឋាភិបាល និងក្រសួងសុខាភិបាល ក៏ដូចជារដ្ឋបាលខេត្តត្បូងឃ្មុំ នូវវិធាន "៣ការពារ ៣កុំ" ដើម្បីបង្ការទប់ស្កាត់ការរីករាលជំងឺកូវីដ-១៩ ក្នុងសហគមន៍កម្ពុជា ៕