លោកជំទាវកិត្តិសង្គហបណ្ឌិត ម៉ែន សំអន គណៈកិត្តិយសសាខាកាកបាទក្រហមកម្ពុជាខេត្តស្វាយរៀង បាននាំយករទះរុញ និងសម្ភារៈមួយចំនួន ដែលជាអំណោយដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់ លោកស្រី ប្រាក់ មន្ថា ដែលមានកូនពិការភាព ៣នាក់ រស់នៅក្នុងបន្ទុក នាព្រឹកថ្ងៃសៅរ៍ ២រោច ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី ៣០ ខែមករា ឆ្នាំ២០២១ នៅខេត្តស្វាយរៀង ។

លោកស្រី ប្រាក់ មន្ថា (ជាស្ត្រីមេម៉ាយ) អាយុ ៥១ឆ្នាំ រស់នៅភូមិកណ្តាល ឃុំខ្សែត្រ ស្រុកកំពង់រោទិ៍ ខេត្តស្វាយរៀង បានប្រាប់ឲ្យដឹងថា ប្តីរបស់គាត់មានឈ្មោះ អ៊ុ តេង អាយុ ៤៦ឆ្នាំ មានកូន ៣នាក់ជាចំណងដៃ ក៏ប៉ុន្តែកូនទាំង ៣នាក់នេះ អភ័ព្វណាស់ កើតមកក្រិន ពិការ គម ដៃជើងខ្វិនដូចគ្នា ។ កូនទី ១ ឈ្មោះ តក់ ធារ៉ា ភេទស្រី អាយុ ២៤ឆ្នាំ បានរៀនដល់ថ្នាក់ទី ៥ ក៏ត្រូវបានឈប់រៀន កូនទី ២ ឈ្មោះ តក់ ធារី ភេទស្រី អាយុ ២១ឆ្នាំ បានទៅរៀននៅភ្នំពេញ ក្រោមការឧបត្ថម្ភរបស់អង្កការ LAVALA ស្ថិតនៅក្នុងក្រុង តាខ្មៅ ។ កូនទី ៣ ឈ្មោះ តក់ រាត្រី ភេទ ប្រុស អាយុ ១២ ឆ្នាំ ពុំទាន់បានចូលរៀននៅឡើយទេ ។ បច្ចុប្បន្នលោកស្រីបានបន្តទៀតថា នៅក្នុងសម័យកូវីដ១៩នេះ លោកស្រីក៏បានទទួលការឧបត្ថម្ភពីរាជរដ្ឋាភិបាល តាមរយៈ បណ្ណសមធម៌ នៃគ្រួសារកីក្រ (ក្រ២) ចំនួន ៥ខែ រួចមកហើយ ដោយក្នុងមួយខែៗទទួលបាន ១៩២.០០០រៀល ។

ថ្លែងក្នុងឱកាសនោះ លោកជំទាវក៏មានប្រសាសន៍ថា ៖ ការនាំយកអំណោយមកប្រគល់ជូន នាពេលនេះបន្ទាប់ពីលោកជំទាវបានឃើញការអំពាវនាវរបស់លោកស្រី ប្រាក់ មន្ថា បានផ្សព្វផ្សាយនៅក្នុងបណ្តាញសារព័ត៌មាន ទើបលោកជំទាវបានចាត់ឲ្យ លោក សុច ពិសី អភិបាលស្រុកកំពង់រោទិ៍ ធ្វើការទំនាក់ទំនងទៅក្រុមគ្រួសារដោយផ្ទាល់និងមានការជួបជុំនាថ្ងៃនេះ ។ លោកជំទាវក៏បានផ្តាំផ្ញើរឲ្យអភិបាលស្រុកកំពង់រោទិ៍ ធ្វើការសម្របសម្រួលក្នុងការនាំយកក្មួយៗបានទៅចុះឈ្មោះចូលរៀននៅក្នុងបវេសនកាលឆ្នាំសិក្សាថ្មីនេះ។ អំណោយនាពេលនេះ រួមមាន ៖ រទេះរុញ ២គ្រឿង អង្គរ ទឹកស៊ីអ៊ីវ ទឹកត្រី សម្លៀកបំពាក់ ស្ករស ទឹកដោះគោ ទឹកសុទ្ធ មី និងថវិកាមួយចំនួន និងការឧបត្ថម្ភជាប្រចាំខែរបស់ ឯកឧត្តម ហោ ណាំហុង ឧបនាយករដ្ឋមន្ត្រី ។

ជាការឆ្លើយតប លោកស្រី ប្រាក់ មន្ថា ក៏សូមគោរពថ្លែងអំណរគុណដល់ លោកជំទាវកិត្តិសង្គហបណ្ឌិត ម៉ែន សំអន ឯកឧត្តម ហោ ណាំហុង ឧបនាយករដ្ឋមន្ត្រី និងលោកជំទាវ ជាពិសេស ក៏សូមគោរពថ្លែងអំណរគុណដល់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលបានគិតគូរអំពីសុខទុក្ខរបស់ប្រជាពលរដ្ឋគ្រប់ទីកន្លែង ដែលបានផ្តល់ជារទេះ ស្បៀងអារហារមួយចំនួននាពេលនេះ ។ លោកស្រីក៏បានគោរពជូនពរដល់ សម្តេច ឯកឧត្តម លោកជំទាវ ដែលជាសប្បុរសជនទាំងអស់ សូមទទួលបាននូវសុខភាពល្អ និងជោគជ័យគ្រប់ភារកិច្ចការងារ ព្រមទាំង ពុទ្ធពរទាំង ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕