កំពង់ឆ្នាំង៖ ថ្ងៃពុធ ៩កើត ខែបុស្ស ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៣ ខែធ្នូ ឆ្នាំ២០២០ ឯកឧត្ដម ប្រាក់ ចំរើន និងលោកជំទាវឧកញ៉ា សេង ពុទ្ធិឆាត ព្រមទាំងបុត្រាបុត្រី និងសហការី បាននាំយកបច្ច័យប្រគេន ព្រះគ្រូវិចិត្រសីលញាណ ខុន ឆុន ជំនួយការសម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា និងជាព្រះចៅអធិការវត្តវារីផាសុខារាម ហៅវត្តទឹកជុំ ឬអង្គជុំ និងបានថ្វាយបង្គំព្រះសពលោកឪ សំ សាន្ត ត្រូវជាសិស្សប្អូនលោកឪ សួង ស្ថិតនៅក្នុងភូមិទឹកជុំ ឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង។
ព្រះគ្រូវិចិត្រសីលញាណ ខុន ឆុន បានមានសង្ឃដីកាជម្រាបជូននូវសមិទ្ធិផល និងការកសាងនៅក្នុងទីវត្តអារាម និងបានប្រគេនពរដល់ឯកឧត្ដម និងលោកជំទាវ ព្រមទាំងបុត្រាបុត្រី និងសហការីសូមបាននូវសេចក្តីសុខ សេចក្តីចម្រើន សុខភាពល្អបរិបូរណ៍ ជន្មាយុយឺនយូរ និងបានជួបប្រទះនូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕