មានបុរសជាអ្នកនេសាទក្រីក្រជនជាតិថៃម្នាក់រើសបានកម្អួតត្រីបាឡែនមួយដុំធំក្នុងពេលគាត់កំពុងនេសាទត្រីក្នុងសមុទ្រ ហើយតាមការវាយតម្លៃបឋមកម្អួតត្រីបាឡែននោះអាចមានតម្លៃរហូតដល់ជាង ៣,២ លានដុល្លារអាមេរិកឯណោះ។ បុរសកំពូលសំណាងរូបនេះមានឈ្មោះថា Naris Suwannasang អាយុ ៦០ បានប្រកបរបរជាអ្នកនេសាទសមុទ្រនេះស្ទើរតែពេញមួយជីវិតគាត់ទៅហើយ តែជីវភាពរបស់គាត់នៅតែក្រីក្រលំបាក។
យ៉ាងណាក្តី ចាប់ពីពេលនេះតទៅជីវិតរបស់គាត់ត្រូវផ្លាស់ប្តូរ ១៨០ ដឺក្រេហើយ ព្រោះថាកម្អួតត្រីបាឡែនដែលគាត់រើសបាននោះមានទម្ងន់រហូតដល់ទៅ ៩៩,៧៩ គីឡូក្រាម ហើយតាមការប៉ាន់ស្មានគេអាចទិញកម្អួតត្រីបាឡែនប្រភេទនេះក្នុងតម្លៃ ៩៦០ ០០០ បាត (៣២ ២០៤ ដុល្លារអាមេរិក) ក្នុងមួយគីឡូក្រាម ហើយបើគិតជាលុយសរុបគឺគាត់អាចទទួលបានរហូតដល់ ៣ ២១៣ ៦៣៧ ដុល្លាអាមេរិកឯណោះ។ សូមបញ្ជាក់ថា កម្អួតត្រីបាឡែនគឺជាវត្ថុធាតុដ៏កម្រសម្រាប់យកទៅផលិតជាទឹកអប់ប្រណិតដែលមានតម្លៃខ្ពស់បំផុតក្នុងពិភពលោក ដូចនេះហើយទើបកម្អួតដែលត្រីបាឡែនបានក្អួតចោលនេះមានតម្លៃខ្ពស់ដែរ៕